Tilsynspersonell frå Mattilsynet i Hedmark og Oppland kontrollerte hausten 2007 49 verksemder i regionen. Alle desse verksemdene produserer spekepølse eller modnar spekepølser som andre verksemder har produsert for dei.  Bakgrunnen for kontrollen var E.coil-utbrotet i 2006, der spekepølser var årsak til smitten.

 

Alle verksemder må ha internkontroll

I kontrollen blei det lagt stor vekt på praktiseringa av internkontrollen i verksemda, sporbarheit for råvarer og ferdigprodukt, samt hygieniske forhold.

 

Resultata viste at produksjonen var i orden i 30 verksemder, og her var det berre nødvendig å gje rettleiing. Hos 19 verksemder blei det avdekka manglar som førte med seg vedtak med tidsfristar for retting av feil. Tre av desse verksemdene hadde avvik av meir alvorleg karakter. Ingen verksemder blei stengt under kontrollen, og det blei ikkje gjeve omsetningsforbod for produkt.