Eit dyr er eit levande vesen som har krav på å bli behandla med omsorg og respekt for sin eigenart. Å skaffe seg eit dyr må grunne i eit ønskje om å gi dyret eit best mogleg liv, og ein må vere motivert for arbeidet og ansvaret som følgjer med det å vere eigar av eit dyr.

I all omgang med dyr skal du ta omsyn til dyra sine eigne interesser og behov. Dyrevernlova stiller krav om at alle dyr i hald skal ha tilgang til passande rom å vere i, fôr og stell, og vern mot sjukdom, unødig redsel og liding. Eit dyr som skal leve saman med menneske må temjast, slik at samværet med menneske ikkje fører med seg frykt eller stress. Dyr skal ikkje bli sett ut for store fysiske eller psykiske påkjenningar.
 
Dyr i hald skal ha tilstrekkeleg plass til å røre seg og til normal åtferd som leik, klatring eller graving. Temperaturen, lyset og luftkvaliteten eller vassmiljøet skal vere tilpassa dyret. I tillegg skal fôr og vatn vere av ein slik kvalitet og mengd at dyret får dekt sine behov for næring og væske. Dyra skal få tilstrekkeleg tilsyn og stell, som for eksempel klipp av negler, reinsing av akvarium eller børsting for å unngå flokar i pelsen. Dyr skal dessutan ha vern mot sjukdom, skade og parasittar. Sjuke dyr skal få behandling av kvalifiserte personar og om nødvendig av veterinær. I nødstilfelle skal dyret avlivast på forsvarleg vis.
 
Myndigheitene stiller strenge krav til bruk av dyr i underhaldning, i sport og liknande. I slike samanhengar er det fare for at dyra blir utsett for stress, frykt, smerte eller anna form for påkjenning. Derfor krev myndigheitene ofte at veterinær er til stades på eller tilgjengeleg for arrangement der det kan vere fare for at dyr blir drive for hardt, eller kvar det er viktig å kontrollere at dyra er i god form før, under og etter arrangementet. Også i aktivitetar som involverer ville dyr, skal arrangørane leggje vekt på at dyra blir behandla varsamt. Ved ferdigheitsframsyningar, trekkhundløp, reinkappløp, sirkusframsyningar eller liknande skal ikkje dyra utsetjast for uforholdsmessig store påkjenningar. Tilsvarande forbod gjeld også ved trening til slike arrangement.
 
Dyr skal ikkje brukast som lotterigevinstar. Dette gjeld også bruk av dyr som gevinstar i tippekonkurransar og liknande. Ved å bruke dyr som lotterigevinst risikerer ein at dyret kjem til ein eigar som ikkje er innstilt på å gi dyret den oppfølginga og respekten det treng. 
 

Dressur av dyr

Dressurmetodar skal byggje på positive stimuli, slik som ros og anna påskjønning. Dyr skal ikkje bli dressert på ein slik måte at dei kjem i fare for å bli skremt eller lide, og dyr skal ikkje bli sparka eller slått verken som ledd i dressering eller i andre samanhengar. Du må aldri lære opp dyret til smertefull eller skadeleg åtferd.
 
Les meir i dyrevernlova §§ 2, 8, 9 ( Sjå lenkje nedanfor)